Лъица абураб авар мацl холеб бугин?

Авар мацl холаро, авар мацlги бокьулел гьебги бицунел лъималги ругелгlан гьезие дарс кьолел мугlалимзабиги ругогlан мехалъ. Гьединал лъималги (цlалдохъабиги) мугlалимзабиги руго Дилимазул гимназиялда. Цоги нухалдав авар мацlалъул берцинлъиги, гьелъул бечелъиги, хинлъиги балагьаразда бихьана 26 декабралда Цlадаса Хlамзатил 140 сон тlубаялда хурхун гимназиялда тlобитlараб конференциялда. Конференциялъул мурад букlана Цlадаса Хlамзатил гlумруялъул, гьесул творчествоялъул бицин, гlадамазул рукlа – рахъиналдаги гlумруялдаги хурхарал сурарал, заралиял, басриял гlадатал какарал, къватlир чlвазарурал гьесул асарал рихьизари.

Цlалдохъабаз кlудияб махщалида рагьана Хlамзатил асаразул сипатал, бицана поэтасул асаразул мацlалъул пасихlлъиялъул, жакъа къоялдаги гьесул асаразул бугеб кlваралъул.