Дилим гимназиялда

авар мацlалда кучlдул пасихlго рикlкlиналъул къецал.

25 январалда гимназиялда тlобитlана авар мацlалъул Дагъистаналъул хъвадарухъабазул кучlдул пасихlго рикlкlиналъул къецал. Къецазулъ гlахьаллъи гьабуна 5-10 классазул цlалдохъабаз. Къецазул мурад букlана лъималазул жидерго гlагараб авар мацlалде рокьи бижизаби., нилъерго хъвадарухъабазул асаразул берцинлъи, магlнаялъул гъварилъи, авар мацlалъул бечелъи цlалдохъабазда , гlенеккаразда, бихьизаби, пасихlго, авторасул рекlел мурадги рагьун, кечl бицине лъимал ругьун гьари.

Къецазул гlахьалчагlи рикьун рукlана кlиго тlелалде: 5-7 классалъул цlалдохъаби ва 8 – 10 классалъул цlалдохъаби. Гlенеккарал хlайран гьаруна цlалдохъабаз кlудияб махщалида рицарал Р.Хlамзатовасул, Ф. Гlалиевалъул, М. Мухlамадовалъул, М. Хlамзаевасул асараз. Къецазулъ бергьенлъи босарал цlалдохъаби кlодо гьаруна грамотабаздалъун ва къиматал сайгъатаздалъун.

Цlалдохъабаз (гьединал миллиял байрамазда) бихьизабуна жидерго гlагараб ракьалде, рахьдал мацlалде, адабияталде бугеб рокьи, пасихlго кечl рикlкlине бугеб гьунар.